សង្គ្រោះជាតិសូមឲ្យព្រះមហាក្សត្រជួយ

25 Apr 2016 ពត៍មានជាតិ

ភ្នំពេញៈ សមាជិករដ្ឋសភា ពីគណបក្សប្រឆាំង បានទូលសុំព្រះរាជអន្តរាគមន៍ ពីព្រះមហាក្សត្រ នរោត្តម សីហមុនី ដើម្បីឱ្យមានការដោះលែងតំណាងរាស្រ្តដែលកំពុងជាប់ពន្ធនាគារ គឺលោក អ៊ុំ សំអាន ដោយចាត់ទុកការចាប់ឃុំខ្លួននេះថា ជាការរំលោភច្បាប់ និងសូមឲ្យព្រះមហាក្សត្រប្រើប្រាស់តួនាទីកំពូល ជាអាជ្ញាកណ្តាល ដើម្បីធានាការប្រព្រឹត្តទៅនៃអំណាចសាធារណៈឱ្យមានភាពទៀងទាត់។

លោក អ៊ុំ តារាវុធ នាយកខុទ្ទកាល័យព្រះមហាក្សត្រ បានបញ្ជាក់កាលពីម្សិលមិញថា លោកមិនបានឃើញលិខិតរបស់សមាជិករដ្ឋសភានៃគណបក្សសង្គ្រោះជាតិ ដែលបានផ្ញើថ្វាយព្រះមហាក្សត្រទេ ដោយលោកបញ្ជាក់ថា លោកកំពុងជាប់រវល់បំពេញបេសកកម្មនៅតាមខេត្ត។

លោក បន្ថែមថា៖ «នៅពេលដែលខ្ញុំវិលត្រឡប់ទៅព្រះបរមរាជវាំងវិញ ខ្ញុំនឹងសួររក [លិខិតនោះ]។

នៅពេលលិខិតដល់ព្រះហស្តព្រះមហាក្សត្រ ព្រះមហាក្សត្រនឹងពិនិត្យ និងសម្រេច»។

លោក អ៊ុំ ដារ៉ាវុធ បានបន្ថែមថា តាមនីតិវិធី បន្ទាប់ពីព្រះមហាក្សត្រ សម្រេច ព្រះបរមរាជវាំង នឹងចេញសេចក្តីប្រកាសព័ត៌មានមួយ។

ក្នុងលិខិតមួយ ដែលបានចុះហត្ថលេខាដោយតំណាងរាស្រ្តប្រហែល ៤០ រូប ពីគណបក្សសង្គ្រោះជាតិ ថ្វាយព្រះមហាក្សត្រ កាលពីចុងសប្តាហ៍ មុនតំណាងរាស្រ្តគណបក្សសង្គ្រោះជាតិ បានទូលសុំឱ្យព្រះមហាក្សត្រ ធ្វើព្រះរាជអន្តរាគមន៍ឱ្យមានការដោះលែងលោក អ៊ុំ សំអាន ដែលត្រូវបានចាប់ ឃុំខ្លួន ដោយរំលោភអភ័យឯកសិទ្ធិរដ្ឋសភា កាលពីយប់រំលងអាធ្រាត្រឈានចូលថ្ងៃទី ១១ ខែមេសា នៅក្នុងខេត្តសៀមរាប។

លិខិតបញ្ជាក់ថា៖ «ជាមួយគ្នានេះដែរ នៅថ្ងៃទី ១២ ខែមេសា ឆ្នាំ ២០១៦ រដ្ឋសភា នៃព្រះរាជាណាចក្រកម្ពុជាបានបើកកិច្ចប្រជុំរបស់ខ្លួន ដោយមានវត្តមានតំណាងរាស្រ្តចំនួន ៦៣ រូប មកពីគណបក្សប្រជាជនកម្ពុជា អនុម័តឲ្យក្រសួងមានសមត្ថកិច្ច បន្តនីតិវិធីចោទប្រកាន់ ចាប់ខ្លួន ឃាត់ខ្លួន ឃុំខ្លួនឯកឧត្តម អ៊ុំ សំអាន ដោយរំលោភទាំងស្រុងទៅលើមាត្រា ៨០ នៃរដ្ឋធម្មនុញ្ញ នៃព្រះរាជាណាចក្រកម្ពុជា ដែលតម្រូវឲ្យមានសំឡេងពីរភាគបី ឬបីភាគបួន នៃសមាជិករដ្ឋសភាទាំងមូល ដើម្បីសម្រេច ឬផ្អាកអំពីការចោទប្រកាន់ ការចាប់ខ្លួន ការឃាត់ខ្លួនឬការឃុំខ្លួន សមាជិកណាមួយនៃរដ្ឋសភា»។

លោក សុខ ឥសាន អ្នកនាំពាក្យគណបក្សប្រជាជន បានថ្លែងកាលពីម្សិលមិញថា សំណើរបស់គណបក្សសង្គ្រោះជាតិទូលសុំព្រះមហាក្សត្រឲ្យដោះលែងលោក អ៊ុំ សំអាន គឺជាសិទ្ធិ របស់ពួកគេ ប៉ុន្តែលោកថា មិនប្រាកដទេថាតើសំណើនោះមានប្រសិទ្ធភាព ឬអត់?

លោកបានបញ្ជាក់ថា៖ «តើដោះលែងរបៀបណា? វាជានីតិវិធីរបស់តុលាការទេ»៕

</div>

សង្គ្រោះ​ជាតិ​សូម​ឲ្យ​ព្រះមហាក្សត្រ​ជួយ

អត្ថបទពេញនិយម

សង្គ្រោះជាតិសូមឲ្យព្រះមហាក្សត្រជួយ