កែវ រំចង់ អាចបំបែកកំណត់ត្រានៅ Thai Fight បានអត់ល្ងាចនេះ?
កែវ រំចង់ អាចបំបែកកំណត់ត្រានៅ Thai Fight បានអត់ល្ងាចនេះ?ជើងខ្លាំងកម្ពុជា កែវ រំចង់ ត្រូវប្រឈមនឹងជើងខ្លាំងថៃ Iquezang នៅក្នុងកម្មវិធី Thai Fight ល្ងាចថ្ងៃទី២៤ ខែតុលានេះនៅប្រទេសវៀតណាមដែលផ្សាយបន្តផ្ទាល់ដោយទូរទស្សន៍ថៃ ប៉ុស្តិ៍លេខ៣ វេលាម៉ោង៦ល្ងាច ហើយប្រសិនបើទទួលបានជ័យជម្នះនោះគឺជាកំណត់ត្រាដំបូងរបស់អ្នក ប្រដាល់កម្ពុជាក្នុងព្រឹត្តិការណ៍ដ៏ធំនេះ។កែវ រំចង់ជាកីឡាករកម្នាក់ដែលមិនធ្លាប់ស្គាល់ពាក្យថា បរាជ័យឡើយជាមួយកីឡាករថៃដែលប្រកួតគ្នានៅប្រទេសកម្ពុជា។ នេះជាលើកទីពីរហើយដែលរំចង់លេខមុខក្នុងកម្មវិធីនេះ ប៉ុន្តែកាលលើកទីមួយបានចាញ់ជើងខ្លាំងថៃ Yodsanklai ក្នុងទឹកទីពីរ។ ចំណែកកីឡាករថៃ Iquezang ជាតារាប្រចាំកម្មវិធី Thai Fight នេះ និងធ្លាប់ប្រកួតរាប់មិនអស់ក្នុងអាជីពប្រដាល់របស់គេ។ អ្វីដែលគួរឲ្យកត់សំគាល់នោះ កីឡាករថៃម្នាក់នេះធ្លាប់បានយកឈ្នះកីឡាករកម្ពុជាពីររូបមកហើយ គឺ វង្ស ណយ និង ពេជ្រ សីហា។ បើនិយាយពីសមត្ថភាពរបស់អ្នកទាំងពីរអាចចាត់ទុកថា មិនសូវលើសខ្វះគ្នាប៉ុន្មានឡើយ។ រំចង់ត្រូវបានគេមើលឃើញថា មានបច្ចេកទេសល្អផ្នែកខាងកណ្តាប់ដៃ និងកែងដ៏មុតស្រួច ខណៈជើងខ្លាំងថៃ Iquezang វិញពូកែខាងវាយលោតសង្ក្រប់ និងការទាត់ដែលងាយធ្វើឲ្យដៃគូចាញ់ច្រាមគេខ្លាំងណាស់។ ទោះយ៉ាងណា ការប្រកួតនេះ កីឡាករថៃមានទម្ងន់លើសកីឡាករកម្ពុជាតិចតូច។ បើនិយាយពីប្រវត្តិរបស់កីឡាករកម្ពុជាក្នុងព្រឹត្តិការណ៍ Thai Fight នេះគឺមានកីឡាករជាច្រើនរូបរួចមកហើយបានបង្ហាញខ្លួន ប៉ុន្តែមិនទាន់មាននរណាម្នាក់ស្គាល់រសជាតិជ័យជម្នះឡើយដូចជា សេន ប៊ុនថេន វង្ស ណយ ពេជ្រ សីហា និងអ៊ុង វីរៈជាដើម។ យ៉ាងណាក៏ដោយ ការប្រកួតរបស់ កែវ រំចង់ ល្ងាចនេះត្រូវបានអ្នកគាំទ្រកម្ពុជាមើលឃើញថា អាចមានសង្ឃឹមទទួលបានជ័យជម្នះ។ ប្រសិនបើកីឡាករកម្ពុជាម្នាក់នេះទទួលបានជ័យជម្នះមែននោះគឺជា កំណត់ត្រាដំបូងហើយ៕
.png)
.png)
.png)
.jpg)
.jpg)
.jpg)
.jpg)
.png)
.png)
.png)
.png)