HONDA នៅកម្ពុជា ប្រកាសប្តូរពោងសុវត្ថិភាពរថយន្តឥតគិតលុយ
ពោងសុវត្ថិភាព គឺជាឧបករណ៍សុវត្ថិភាពដែលសំខាន់បំផុត សម្រាប់ការពារអាយុជីវិត របស់អ្នកដំណើរគ្រប់ៗគ្នានៅក្នុងរថយន្ត នៅពេលជួបគ្រោះថ្នាក់ចរាចរណ៍ជាយថាហេតុ។ បើសិនជាពោងសុវត្ថិភាព ទាំងនោះមិនដំណើរការ ឬមានបញ្ហាផ្ទុះដោយខ្លួនឯង វាក៏ជាគ្រោះថ្នាក់មួយដ៏ធំ ដែលយើងមើលមិនឃើញ មិនថារថយន្តថ្មី ឬ ចាស់ក៏ដោយ។
នៅប្រទេសកម្ពុជា គេមើលឃើញថាមានរថយន្តចាស់ៗច្រើនកំពុងចរាចរណ៍លើដងផ្លូវ តែអ្នកប្រើប្រាស់ទាំងនោះប្រាកដជាមិនដែលដឹងពីបញ្ហាពោងសុវត្ថិភាពនៅក្នុងរថយន្តទាំងនោះទេ ថាវាមិនដំណើរការ ឬ ប្រសិទ្ធភាពវានៅដល់កម្រិតណានោះទេ។ ដូច្នេះហើយទើប ឧស្សាហកម្មផលិតរថយន្តធំៗ ទាំងអស់នៅលើពិភពលោក ជាពិសេសក្រុមហ៊ុន Honda បានធ្វើការផ្សព្វផ្សាយធ្វើការផ្លាស់ប្ដូរជូនអតិថិជនរបស់ខ្លួនដោយមិនគិតថ្លៃចំពោះផ្នែកពោងសុវត្ថិភាពនេះ ដោយយោងទៅតាមការតាមដាន និងត្រួតពិនិត្យយ៉ាងខ្លាំងអំពីប្រពន្ធសុវត្ថិភាពនេះ ឃើញថាពិតជាកំពុងជួបបញ្ហា។
នៅប្រទេសកម្ពុជាក្រុមហ៊ុន ភ្នំពេញ ហុងដា គឺជាក្រុមហ៊ុនតែមួយគត់ដែលនាំចូលនិងចែកចាយរថយន្តម៉ាក HONDA ផ្ដាច់មុខ ទាំងផលិតផល និងសេវាកម្មជួសជុល ផ្ទាល់ពីប្រទេសជប៉ុន។ ក្រុមហ៊ុនបានទទួលព័ត៌មានអំពីកម្មវិធីនេះ នឹងកំពុងធ្វើការអំពាវនាវ ឲ្យអតិថិជន ដែលប្រើប្រាស់រថយន្ត HONDA ចាស់ៗនៅក្នុងស្រុក ចូលមកធ្វើការផ្លាស់ប្ដូរដោយមិនគិតថ្លៃ ដោយមានបន្ថែមនូវសេវាកម្មពិនិត្យលើរថយន្តដល់ទៅ ២៦ ចំណុច និងលាងរថយន្តថែមទៀតផង។
រថយន្ត Honda ដែលត្រូវធ្វើការផ្លាស់ប្ដូរមានដូចជា Honda CR-V, Honda CITY, Honda CIVIC, Honda PILOT, និង Honda ACCORD ដែលមានឆ្នាំផលិតចាប់ពី ឆ្នាំ ២០០២ ដល់ ឆ្នាំ ២០១៣។ ហេតុនេះហើយអ្នកដែលប្រើប្រាស់នូវប្រភេទរថយន្តទាំងនេះ អាចអញ្ជើញទៅកាន់យានដ្ឋានជួសជុលរបស់ ក្រុមហ៊ុន ភ្នំពេញ ហុងដា ដែលមានទីតាំងទល់មុខ អាកាសយានដ្ឋាន អន្តរជាតិ ភ្នំពេញ។ កម្មវិធីនេះនឹងផ្ដល់ជូនអតិថិជនរហូតដល់អស់ពីស្តុក។
សម្រាប់ព័ត៌មានបន្ថែមសូមធ្វើការទំនាក់ទំនង ទៅកាន់ក្រុមហ៊ុនផ្ទាល់ដែលមានលេខទូរសព្ទ ពីរខ្សែ ៖ 017 888 564 / 017 888 526ឬ ក៏អាចចូលទៅកាន់គេហទំព័រនេះ ដើម្បីត្រួតពិនិត្យអំពីលេខកូដ រថយន្តថាត្រូវផ្លាស់ប្ដូរពោងសុវត្ថិភាព ឬអត់ ៖ www.myhondaairbag.com។