ព្រះអាទិត្យសិប្បនិម្មិតរបស់កូរ៉េ បង្កើតបានកំណត់ត្រាពិភពលោកអស្ចារ្យមួយ
ម៉ាស៊ីនឈ្មោះថា Korea Superconducting Tokamak Advanced Research (ហៅកាត់ថា KSTAR) ដែលគេដាក់ឈ្មោះឲ្យថាជាព្រះអាទិត្យសិប្បនិម្មិតរបស់កូរ៉េខាងត្បូង បានបង្កើតកំណត់ត្រាពិភពលោកដោយវាអាចដំណើរការនៅសីតុណ្ហភាពក្ដៅបំផុតរបស់វា (១០០លានអង្សាសេ) បានរយៈពេលដល់ ២០វិនាទី។
រយៈពេល ២០វិនាទីនេះ ស្ដាប់ទៅគឺមិនយូរនោះទេ ប៉ុន្តែកន្លងមកមិនធ្លាប់មានម៉ាស៊ីនរំលាយថាអាចដំណើរការបានលើសពី ១០វិនាទី នៅសីតុណ្ហភាព ១០០លានអង្សាសេនោះទេ សូម្បីតែម៉ាស៊ីន KSTAR នេះពីមុនមកអាចដំណើរការយូរបំផុតត្រឹម ៨វិនាទីប៉ុណ្ណោះកាលពីឆ្នាំ ២០១៩។
សមិទ្ធផលនេះ នៅមិនទាន់សម្រេចគោលដៅរបស់ KSTAR បាននៅឡើយទេ ដោយមានគោលដៅដំណើរការឥតឈប់ឲ្យបានរយៈពេល ៥នាទី ក្នុងសីតុណ្ហភាពខ្ពស់ ដែលចង់សម្រេចឲ្យបាននៅត្រឹមឆ្នាំ ២០២៥។
គួរដឹងថាគម្រោងការព្រះអាទិត្យសិប្បនិម្មិតនេះ បង្កើតឡើងដើម្បីរិះរកវិធីបង្កើតប្រភពថាមពលមួយចេញពីរ៉េអាក់ទ័រនៃការរំលាយថាមពលនុយក្លេអ៊ែរ។ ប្រសិនបើគម្រោងការនេះប្រព្រឹត្តទៅដោយរលូន វានឹងអាចផ្ដល់នូវប្រភពថាមពលមិនចេះអស់មួយ ដែលអាចនឹងដោះស្រាយវិបត្តិថាមពលពិភពលោកបាន។ បច្ចុប្បន្ននេះពិភពលោកប្រើប្រាស់ឥន្ធនៈហ្វូស៊ីលជាប្រភពថាមពល ដែលវាអាចនឹងបាត់បង់នៅពេលណាមួយ៕