ជប៉ុន ចាប់ផ្ដើមប្រជែងពាណិជ្ជកម្មនៅអាស៊ីកណ្តាល ខណៈចិនកំពុងមានឥទ្ធិពលនៅទីនោះស្រាប់
កាលពីម្សិលមិញនេះ មេដឹកនាំជប៉ុនបានចាកចេញពីទីក្រុងតូក្យូ ក្នុងដំណើរទៅកាន់ប្រទេសម៉ុងហ្គោលី ដែលជាផ្នែកមួយនៃទស្សនកិច្ចរយៈពេលវែងនៅតំបន់អាស៊ីកណ្ដាល។ ទស្សនកិច្ចនេះមានគោលបំណងពង្រីកទំហំពាណិជ្ជកម្មរវាងជប៉ុននិងប្រទេសទាំង៦ ខណៈដែលចិនក៏កំពុងតែពង្រីកឥទ្ធិពលចូលក្នុងតំបន់ដែលសម្បូរដោយធនធាននេះផងដែរ។
នាយករដ្ឋមន្ត្រីជប៉ុន លោក ស៊ីនហ្សូ អាបេ បានចេញដំណើរឆ្ពោះទៅកាន់ទីក្រុងអូឡង់បាទ័រ ប្រទេសម៉ុងហ្គោលីក្នុងទស្សនកិច្ចផ្លូវការជាលើកដំបូងនៅទីនោះចាប់តាំងពីឆ្នាំ២០១៣មក។ មន្ត្រីអមដំណើរលោក អាបេ ភាគច្រើនគឺជាតំណាងក្រុមហ៊ុនប្រមាណ៥០ក្នុងប្រទេសជប៉ុន។
ក្រោយបញ្ចប់ទស្សនកិច្ចនៅម៉ុងហ្គោលី លោកនាយករដ្ឋមន្ត្រីជប៉ុន នឹងធ្វើដំណើរទៅកាន់ប្រទេសកាហ្សាក់ស្ថាន និងអ៊ូសបេគីស្ថាន។ បន្ទាប់មក លោកអាបេនឹងបន្តចាប់ផ្ដើមទស្សនកិច្ចលើកដំបូងរបស់លោកនៅឯប្រទេស តួកម៉េនីស្ថាន តាហ្ស៊ីគីស្ថាន និងកៀហ្ស៊ីស៊ីស្ថាន។ ក្នុងដំណើរទស្សនកិច្ចរយៈពេលវែងនេះ នឹងមានការចុះហត្ថលេខាលើកិច្ចព្រមព្រៀងពាណិជ្ជកម្មជាច្រើនដែលមានទំហំទឹកប្រាក់រាប់ពាន់លានដុល្លារ។
‹‹ម៉ុងហ្គោលីនិងបណ្ដាប្រទេសនៅអាស៊ីកណ្ដាល គឺជាបេះដូងរបស់អាស៊ីនិងជាទីតាំងយុទ្ធសាស្ត្រដ៏សំខាន់»។ នេះជាការលើកឡើងរបស់លោកនាយករដ្ឋមន្ត្រីអាបេ នៅមុនការចាកចេញពីព្រលានយន្តហោះក្រុងតូក្យូ។ លោកបន្តទៀតថា លោកចង់រឹតចំណងមិត្តភាពជាមួយប្រទេសទាំងនោះ។
យ៉ាងណាមិញ មហាយក្សចិន ក៏កំពុងតែពង្រីកឥទ្ធិពលរបស់ខ្លួនចូលក្នុងតំបន់ដែលពោរពេញដោយធនធានធម្មជាតិផងដែរ។ ជាមួយការផ្ដើមគំនិតបង្កើតធនាគារអភិវឌ្ឍហេដ្ឋារចនាសម្ព័ន្ធអាស៊ី ចិនបានជ្រៀតចូលយ៉ាងជ្រៅក្នុងតំបន់អាស៊ីកណ្ដាលតាមរយៈជំនួយដ៏សន្ធឹកសន្ធាប់របស់ខ្លួន។
កន្លងមក ប្រទេសនៅអាស៊ីកណ្ដាលទាំងអស់តែងតែពឹងផ្អែកលើការនាំចេញធនធានធម្មជាតិរបស់ខ្លួន ប៉ុន្តែនាពេលបច្ចុប្បន្ន ប្រទេសទាំងនោះ បានកំពុងទាក់ទាញការ វិនិយោគលើការអភិវឌ្ឍហេដ្ឋារចនាសម្ព័ន្ធ ដើម្បីបង្កើនវិស័យឧស្សហកម្មសេដ្ឋកិច្ចរបស់ខ្លួន។
សូមបញ្ជាក់ដែរថា ចាប់តាំងពីការឡើងជានាយករដ្ឋមន្ត្រីកាលពីឆ្នាំ២០១២ លោក អាបេ បានបំពេញទស្សនកិច្ចជាច្រើនលើកទៅកាន់បរទេសក្នុងគោលបំណងពង្រីកឥទ្ធិពលរបស់ជប៉ុន។ ម្យ៉ាងទៀត នេះគឺជាការបង្កើនទំហំសេដ្ឋកិច្ចជប៉ុន ដែលជាមហាអំណាចសេដ្ឋកិច្ចលំដាប់ទី៣ របស់ពិភពលោកផងដែរនោះ៕
.png)
.png)
.png)
.jpg)
.jpg)
.jpg)
.jpg)
.png)
.png)
.png)
.png)