ផ្លូវសំខាន់ៗនៅភ្នំពេញ នឹងបិទចរាចរណ៍ ក្នុងថ្ងៃដ៏ពិសេសខានស្អែកនេះ
រំលង១ថ្ងៃទៀត ពោលគឺនៅថ្ងៃទី ០៩ វិច្ឆិកា ខួបអនុស្សាវរីយ៍ លើកទី៦៥ឆ្នាំ នៃការទទួលការឯករាជ្យរបស់កម្ពុជា ដែលព្រឹត្តិការណ៍ប្រវត្តិសាស្ត្រក្នុងឆ្នាំនេះ អគ្គស្នងការនគរបាលជាតិ បានប្រកាសថា មានអ្នកចូលរួមជាង២ម៉ឺននាក់ និងរៀបចំធំជាងរាល់ឆ្នាំ ដែលមាន កម្លាំងមហាជន កម្លាំងសមត្ថកិច្ចចម្រុះ មកពីក្រសួង ស្ថាប័ននានា និងមានពិធីព្យុះហយាត្រា ពីអង្គភាពពាក់ព័ន្ធនីមួយៗចូលរួមផងដែរ។ឯកឧត្តម នាយឧត្តមសេនីយ៍សន្ដិបណ្ឌិត នេត សាវឿន អគ្គស្នង ការដ្ឋាននគរបាលជាតិ បានបញ្ជាក់ថា កិច្ចប្រជុំនេះ ផ្តោតទៅលើបញ្ហាប្រឈម និងសភាព ការណ៍ជាក់ស្តែង ដើម្បីរួមគ្នាដោះស្រាយ ក្នុងគោលបំណងធំតែមួយគត់ គឺធានាសុវត្ថិភាព ឱ្យបាន១០០ភាគរយ។ ឯកឧត្តម នាយឧត្តមសេនីយ៍បានអះអាងថា “នេះជាកិច្ចការដែលយើង ត្រូវធានាចំពោះរាជរដ្ឋាភិបាលដើម្បីការរក្សាសន្តិសុខ សណ្តាប់ធ្នាប់ និងសុវត្ថិភាពឱ្យបាន ទាំងស្រុង។ គោលដៅរបស់យើងត្រូវយកចិត្តទុកដាក់នៅជុំវិញវិមានឯករាជ្យ និងតាម ដងផ្លូវ។”ព្រះរាជពិធីបុណ្យឯករាជ្យជាតិ ខួបលើកទី៦៥ ឆ្នាំនេះ គឺធ្វើខុសពីបណ្តាឆ្នាំមុនៗ គឺនឹងមានព្រឹត្តិ ការណ៍ធំពីរ គឺពិធីថ្វាយទៀនជ័យ នៅវិមានឯករាជ្យ និងមិទ្ទិញមហាជន នៅមុខព្រះបរមរាជ វាំង។ សមត្ថកិច្ចនឹងបន្ថែមកម្លាំងការពារនៅគោលដៅចំនួនបីគឺ ទី១. នៅវិមានឯករាជ្យ ទី២. នៅព្រះបរមរាជវាំង និងទី៣. នៅតាមដងផ្លូវ។នៅក្នុងពិធីមិទ្ទិញនោះដែរ ការរៀបចំសណ្តាប់ធ្នាប់ សន្តិសុខ តាមផ្លូវទឹក ក៏នឹងត្រូវបិទចរាចរណ៍ ដោយមិនអនុញ្ញាតឲ្យមានការឆ្លងកាត់នោះឡើយចាប់ពីម៉ោង៥ភ្លឺ រហូតទៅដល់ម៉ោង១២ថ្ងៃត្រង់ ដើម្បីទុកឲ្យពិធីមិទ្ទិញដំណើរការបានល្អមិនមានការរំខាន។