ក្រសួងសាធារណការ បញ្ចេញកម្មវិធីថែទាំផ្លូវ សម្រាប់ពលរដ្ឋរាយការណ៍ពីផ្លូវខូច
ក្រសួងសាធារណការ និងដឹកជញ្ជូន ទើបតែប្រកាសពីកម្មវិធីថ្មីមួយទៀត នៅព្រឹកថ្ងៃទី២០ ខែមីនា ឆ្នាំ២០២៣នេះ ដែលជាកម្មវិធីមួយ សម្រាប់ប្រជាពលរដ្ឋអាចរាយការណ៍ពីស្ថានភាពផ្លូវគ្រប់ទីកន្លែង មិនថាក្នុងតំបន់ខ្លួនរស់នៅ ឬផ្លូវដែលគាត់ធ្វើដំណើរឆ្លងកាត់ ក្នុងន័យដើម្បីអាចផ្តល់ដំណឹងជូនក្រសួងចាត់វិធានការបានទាន់ពេលវេលា។
យោងតាមការផ្សព្វផ្សាយនៅលើផេកផ្លូវការរបស់ ក្រសួងសាធារណការ និងដឹកជញ្ជូន បានឱ្យដឹងថា ROAD CARE Mobile App ជាកម្មវិធីថែទាំផ្លូវលើស្មាតហ្វូនថ្មីមួយ ដែលសាធារណជនអាចថតពីស្ថានភាពផ្លូវដែលខូចៗ រាយការណ៍ មកកាន់ក្រសួងសាធារណការ និងដឹកជញ្ជូនបាន ដោយគ្រាន់តែតំឡើងកម្មវិធីនេះ និងធ្វើតាមការណែនាំក្នុងកម្មវិធី។
តាមរយៈកម្មវិធីនេះ ក្រសួងសាធារណការ និងដឹកជញ្ជូន គូសបញ្ជាក់ទៀតថា បងប្អូនប្រជាពលរដ្ឋ មិនត្រឹមតែអាច ថតរូបភាពរាយការណ៍ ពីស្ថានភាពផ្លូវខូចខាតប៉ុណ្ណោះទេ គឺថែមទាំងអាចចូលរួមសហការរាយការណ៍ ពីផ្លូវដែលត្រូវ ជួសជុលថែទាំ និងសញ្ញាចរាចរណ៍ បានថែមទៀតផង។
គួរបញ្ជាក់ថា លោកអ្នកទាញយក និងដំឡើងកម្មវិធីនេះ ដោយឥតគិតថ្លៃពីតាមរយៈ Link ខាងក្រោមនេះ៖
App Store: roadcare.mpwt.gov.kh/ios
Play Store: roadcare.mpwt.gov.kh/android
សម្រាប់ព័ត៌មានបន្ថែម គឺអាចទំនាក់ទំនងទៅកាន់លេខ 1275 ៕